सुर्खेत । आगामी फागुनमा सुर्खेतमा सञ्चालन गर्न लागि सुर्खेत महोत्सवमा भिजिट कर्णाली यातायात प्रा.लि.ले पर्यटकीय क्षेत्र घुमाउने भएको छ । महोत्सव अवधिभर दैलेखको पञ्चकोशी तिर्थस्थल र सल्यानको कुपिण्डे दह घुमाउने गरी प्रा.लि.ले प्याकेज सार्वजनिक गरेको हो ।

पञ्चकोशी क्षेत्र घुम्नका लागि प्रा.लि.ले दुई ओटा प्याकेज बनाएको छ । पहिलो प्याकेजमा दैलेखको गुराँसहुँदै कोटीलाबाट पादुका घुमेर वीरेन्द्रनगर फर्केने रहेको छ । वीरेन्द्रनगरबाट विहान ९ बजे गुराँस पुग्ने र नास्तापछि भ्यूटार अवलोकलपछि डुंगेश्वरमा खाना खाने तालिका प्रा.लि.ले बनाएको छ ।

यस्तै, चुप्राहुँदै कोटीला, शिरस्थान, नाविस्थानबाट दुल्लु बजारमा बस बस्ने् प्याकेज तयार गरिएको प्रा.लि.का अध्यक्ष प्रकाश शाहीले जानकारी दिए । उनले दोस्रोदिन धुलेश्वेरहुँदै पादुकाबाट तल्लोडुङ्गेश्वेरमा खाना खायर पुनः वीरेन्द्रनगर फर्कने गरी प्याकेज बनाएको बताए ।

यो प्याकेज अन्तरगत ३६ हजार चारसय भाडादर कायम गरिएको छ । आठ जना यात्रु हुने स्करपियो गाडीमा प्रति व्यक्ति चार हजार पाँचसय पचास रुपैयाँ भाडा पर्नेछ ।

दोस्रो प्याकेज प्रा.लि.ले १९ हजार ७५० भाडादर कामय गरेको छ । विहान सवाँ ८ बजे दैलेखको गुराँसे पुग्ने, चुप्राहुँदै काटीला, शिरस्थान, नाविस्थान, धुलेश्वर, पादुका र तल्लोडुंगेश्वर पुगेर सोही दिन सुर्खेत फर्किने तालिका बनाएको शाहीले जनाए । उनले आठ जना यात्रुका लागि प्रतिव्यक्ति २४७० रुपैयाँ भाडादर कायम गरिएको बताए ।

सल्यानको कपिण्डे ताल घुमाउने प्याकेज अन्तरगत बिहान साढे ८ बजे सुर्खेतबाट यात्रा शुरु गर्ने र मेहलकुनामा खाना खाने तालिका बनाइएको छ । त्यसपछि कुपिण्डे ताल घुमेर बालुवासंग्रहीमा नास्तापछि सोही दिन साँझ वीरेन्द्रनगर फर्कनेगरी समयतालिका बनाएको शाहीको भनाई छ । यहीँ माघ २६ गतेदेखि फागुन ५ गतेसम्म हुने भनिएको महोत्सव फागुन १४ गतेदेखि २२ गतेसम्म वीरेद्रनगरमा सञ्चालन गर्न लागिएकाे हाे ।