सुर्खेत । गत भदौ २३ र २४ गते देशभर भएको जेन–जी आन्दोलनका क्रममा कर्णाली प्रदेशका तीन जिल्लामा सरकारी तथा निजी भौतिक संरचनामा ठुलो क्षति पुगेको छ । सुर्खेत, जुम्ला र मुगुमा तीन जिल्लामा गरि ५२ वटा भवनमा क्षति पुगेको हो ।
सुर्खेतमा ४४, जुम्लामा ६ र मुगुमा २ भवन आंशिकदेखि पूर्ण रूपमा ध्वस्त भएका छन् । यीमध्ये सङ्घीय ५, प्रादेशिक ७, जिल्ला तथा स्थानीय तहका १७, व्यक्तिगत ८, अन्य सङ्घ–संस्थाका ३ र पार्टी कार्यालय १२ भवनमा क्षति पुगेको कर्णाली प्रहरी प्रदेश कार्यालयले जानकारी दिएको छ ।
जलेर पूर्ण रूपमा नष्ट भएका भवनको सङ्ख्या २० रहेको प्रदेश प्रहरी प्रवक्ता वरिष्ठ उपरीक्षक (एसएसपी) केदार खनालले बताए । उनका अनुसार सङ्घीय १, प्रादेशिक ४, जिल्ला तथा स्थानीय तहका ७, व्यक्तिगत ४, अन्य सङ्घ–संस्थाका १ र पार्टी कार्यालय ७ भवन रहेका छन् ।
सवारीसाधनतर्फ ४५ वटा गाडी र मोटरसाइकलमा क्षति पुगेको छ । सरकारी गाडीमध्ये ६ पूर्ण रूपमा जलेका छन् भने, १३ आंशिक क्षतिग्रस्त भएका छन् । त्यस्तै मोटरसाइकल १४ पूर्ण रूपमा जलेका र ५ आंशिक क्षतिग्रस्त छन् । निजी सवारीसाधनतर्फ २ गाडी पूर्ण रूपमा जलेका, ४ गाडी र १ मोटरसाइकल आंशिक क्षतिग्रस्त भएका एसएसपी खनालले बताए ।
आन्दोलनका क्रममा प्रदेशभर १३ जना सर्वसाधारण घाइते भएका छन् । उनीहरूको अवस्था सामान्य रहेको र विभिन्न अस्पतालमा उपचार भइरहेको प्रदेश प्रहरीले जनाएको छ ।
नेपाल कर्म । २ आश्विन २०८२, बिहीबार १६:५१