सुर्खेत । गीतकार टिकाराम ढकालको रचना रहेको गीत “छोरो गयो परदेश” को म्युजिक भिडियो सार्वजनिक भएको छ। डिजराज पौडेलको स्वर तथा संगीत रहेको  गीतको म्युजिक भिडियो काठमाडौंमा वरिष्ठ हास्य कलाकार एवं गीतमा प्रमुख भुमिकामा अभिनय गरेका नारद खतिवडाले सार्वजनिक गरेका हुन्।

नेपाल सरकार, वैदेशिक रोजगार बोर्डको निर्देशक समेत रहेका ढकाल कर्णाली प्रदेशको सुर्खेतका स्थायी बासिन्दा हुन् । उनको आफ्नै युट्युव च्यानल @DhakalTR बाट रिलिज गरिएको गीतमा नेपालको वैदेशिक रोजगारीको वर्तमान अवस्था, सो सम्बन्धमा आम मानिसमा सिर्जना भएको धारणा र भाष्य लगायतको यथार्थता देखाउन खोजिएको छ ।

गीतको अन्त्यमा वैदेशिक रोजगारप्रति निराशमात्र हुनु नपर्ने र सोबाट नेपालले गर्न सक्ने विकास एवं समृद्धि सम्बन्धी सकारात्मक सन्देश दिन खोजेको छ। गीत सार्वजनिक कार्यक्रममा बोल्दै गीतकार ढकालले भने, “म आफै वैदेशिक रोजगारमा जाने नेपाली श्रमिकको कल्याणकारी कार्य गर्ने निकायमा कार्यरत रहेकोले वैदेशिक रोजगारीका समस्या, पीडा, वर्तमान अवस्था प्रत्यक्ष रुपमा नजिकबाट अनुभुति गरेको र भावी दिनमा यसको सकारात्मक असर देखिने समेत अनुभुत गरी सो विषयलाई सन्देशमूलक गीतबाट आम श्रोता तथा दर्शकमाझ पस्किने जमर्को गरेको छु ।”

निर्मित भिडियोलाई स्वदेश तथा विदेशमा रहने सम्पूर्ण नेपाली आमाबुवा, दाजुभाई तथा दिदि बहिनीहरुले हेरी शेयर गरिदिन समेत उनले अनुरोध गरेका छन्। यसअघि उनले निर्माण गरेको ख्यालै ख्यालैमा भैयो बन्धकी बोलको गीत गत दशैंमा सार्वजनिक गरेका थिए।

कार्यक्रममा बोल्दै वरिष्ठ हाँस्य कलाकार नारद खतिवडाले वैदेशिक रोजगारीको वर्तमान अवस्थाले निराशावादी रहेका आम श्रोतालाई आशावादी बन्नेतर्फ सकारात्मक सन्देश दिएको बताए ।

उनले गीतमा ढकालसँग सहकार्य गर्न पाउँदा आफूलाई खुसी लागेको बताएका छन्। गायक डिजराज पौडेलले आफुहरुले उक्त गीत मार्फत मनोरञ्जनात्मक तवरले सन्देश समेत दिन खोजेको र आफूले गाएका गीतहरु मध्ये उत्कृष्ट रहेको बताएका छन्। कार्यक्रममा म्युजिक भिडियो निर्देशक कपिल कार्की लगायतका निर्माण टिमको उपस्थिति थियो।

गीतको भिडियो निर्देशक कपिल कार्कीले निर्माण गरेका हुन भने भिडियोमा कलाकार नारद खतिवडा, दिपेन्द्र खत्री (आरुष), डिजराज पौडेल, टिकाराम ढकाल, मन्जु श्रेष्ठ, आरोभ ढकाल लगायतको अभिनय देख्न सकिन्छ।